Nahitso na ang koordinasyon sa tunga sang Commission on Elections kag Provincial Health Office sang Negros Occidental para sa palaabuton nga piniliay sa Lunes, Mayo 9.
Suno kay Provincial Health Officer Dr. Ernell Tumimbang, ang Comelec may gintumod na nga isolation area kun sa diin magabotar ang mga pumuluyo nga makitaan sang mga sintomas kaangay sang hilanat.
Suno kay Tumimbang, ang Comelec bilang lead agency sa pagpatigayon sang piniliay, sarang makapakig-angot sa municipal ukon city health offices sang tagsa ka LGUs para sa deployment sang nurses agud mag-monitor sang mga botante.
Kun may mga pumuluyo nga kinahanglan nga i-isolate, sila ang igareport sa LGU para sa nagakaigo nga monitoring.
Kinahanglan man nga mapatuman ang minimum health protocols sa mga voting precincts kasubong sang social distancing kag pagsuksok sang face mask.
Ang tanan mahimo magboto, nabakunahan man ukon wala batok sa COVID-19 magluwas nalamang sa positibo sa COVID-19.
May yara man nga ginbakal nga PPEs ang COMELEC para sa mga personnel sini nga magaserbe sa May 9, 2022 national kag local elections.
