Indi na magkomento si Bacolod City Vice Mayor El Cid Familiaran angot sa statement ni outgoing Bacolod City Mayor Evelio “Bing” Leonardia matapos ang eleksyon, kun sa diin napierde ini sang challenger nga si Albee Benitez.
Santo sa statement nga ginpagwa ni Leonardia, ginatun-an sa karon sang legal team sang Grupo Progreso kag mayorya sang mga kaupod sini sa slate ang mga tikang nga sarang nila mahimo kasunod sang iya kalutusan sa ginhiwat nga piniliay sang Lunes.
Suno kay Leonardia, ginatun-an sang ila mga abogado ang posible nga pagpa-recheck sang mga vote counting machines (VCMs) nga gingamit sa ciudad sang Bacolod.
Santo sa statement, ginatugyan nila sa ila nga legal team ang pagtuon kun ano ang maayo nga himuon kag paglantaw sang mga legal remedies agud nga macheck liwat ang mga VCMs agud nga masabat ang ila mga pamangkot.
Una diri, nakibot ang grupo progreso sa resulta sang eleksyon kag ginakabig ini sang alkalde nga misteryoso.
Suno kay Familiaran, indi ini maghatag sang komento angot sa nasambit nga tikang kag ini ang nakadepende na kay Leonardia.
