Panawagan ni Political Analyst Atty. Jomax Ortiz nga dapat makahibalo magbatun sang kapierdihan ang mga napaslawan sa ila nga ginpili nga Presidente.
Suno sa abogado, magasugod na ang bag-o nga administrasyon kag isa sa ginaduso ni President-elect Ferdinand “Bongbong” Marcos Jr amo ang pag-unite sang mga Filipino gani indi kita dapat nga magdis-unite.
Suno diri, ang ginabuhat sadto sang iban nga kandidato kaangay sanday Mayor Isko Moreno Domagoso, ang nagabayolar sa Unity nga ginapangita.
Sa pihak nga bahin, pahanumdom naman sini sa mga nagboto kay outgoing Vice President Leni Robredo nga kun ang mga ini nagapati sa demokrasya dapat nga patihan man ang nakabutang sa Omnibus Election Code kun sa diin maathag nga bisan isa lang ang abanse sang nagapanguna nga kandidato, ini ang makapungko sa pwesto.
Paathag ni Ortiz nga kun ang isa lang ang abanse sa kasumpong ang sarang makapungko sa pagka-Presidente labi nagid nga makapungko si Bongbong Marcos nga nagdangat 17 million ang abanse batok kay Robredo.
Madumduman nga nagdangat sa 31 million votes ang nabatun ni Marcos samtang yara naman sa kapin 15 million ang boto nga nabatun ni Robredo.
Pahanumdom ni Ortiz nga bisan ano kadamo ang kandidato, isa lang ka tawo ang makapungko sa pwesto.
Sa pihak nga bahin, ginpahanumdom man sang abogado nga indi masiling nga manipulated ang mga computers bangod indi na ini kaangay sadto sa tiyempo ni late President Ferdinand Marcos Sr kag late President Cory Aquino kun sa diin tuman ka layo ang isip sang Commission on Election (Comelec) kag National Citizens’ Movement for Free Election (Namfrel).
Paathag ni Ortiz nga sadto, si Aquino ang abanse sa Namfrel apang si Marcos naman ang abanse sa Comelec.
Nagapati ang abogado nga indi na kaangay sadto ang sitwasyon sa karun nga automated election na.
Samtang panugyan naman sini sa mga luyag gamuhon ang panibag-o nga administrasyon bangod si Robredo ang luyag nga magpungko nga ibutang sa husto kag sa layi ang paminsar.
Ginakasubo sini nga wala pa makapungko si Marcos, ang ginapaminsar sang tawo ang kun paano na ini gamuhon.
Panugyan ni Ortiz nga hatagan sang tion si Presidente Rodrigo Duterte nga pamunuan ang pungsod samtang may nabilin pa ini nga kahigayunan kag hatagan man sang tyansa nga tumanon ni Bongbong Marcos ang plano sini nga I-unite ang mga Pilipino sa pagpungko sini bilang Presidente sumugod sa Hunyo 30.
Pahanumdom sini nga indi na dapat kwestyunon ang kadalag-an ni Marcos kun wala man ini sang matuod nga manipulasyon.
Paathag sini nga mas maayo nga hatagan sang tyansa nga magpamuno ang bag-o nga Presidente kag pamatud-an ang iya kaugalingon, apang sa tion nga ini ang magparehas na sang tikang sa iya amay, amo na ang tion nga magpatigayon sang people power.
