Nagpahanumdom ang Provincial Election Supervisor sang Negros Occidental sa mga kandidato, nagdaog man ukon napierde, nga indi pagkalipatan ang pagfile sang Statement of Contribution and Expenditures (SOCE) sa pagpatigayon sang kampanya.
Suno kay Atty Roberto Salazar, sa pagfile palang sang certificate of candidacy (COC), napahibalo na sa mga kandidato nga kabahin sa ila obligasyon ang pagfile sang SOCE.
Ini ang required santo sa Section 11 sang Omnibus Election Code sa tanan nga kandidato nagdaog man sa eleksyon ukon wala.
Pinaagi sini, matsekyar sang Commission on Elections (Comelec) kun nagsobra sa gintalana nga magasto sa pagpangampanya ang isa ka kandidato.
Nahibaluan nga nakadepende man sa pwesto sa gobyerno nga ginapapilian ang kadakuon sang limitasyon sa magastos sa Campaign Period.
Makita man sa SOCE kun pila ang balor sang mga kontribusyon nga nabatun sang kandidato kag nagamit sa pagpangampanya kaangay sa mga campaign poster, flyers, endorsement kag iban pa.
Nahibaluan nga santo sa Comelec, nagadangat sa 500 ang mga kandidato nga nagpapili sa nagkalainlain nga pwesto sa 2016 kag 2019 elections nationwide ang tubtob sa karun wala gihapon nakafile sang ila SOCE.
Nahibaluan nga pila sa mga ini ang nagpapili liwat sa 2022 Elections.
Paathag ni Salazar nga santo sa Omnibus Election Code, ang mga mapaslawan sa pagfile sang SOCE ukon naglapaw sa natalana nga budget, nagdaog man ukon napierde, ang may penalidad nga perpetual disqualification sa pagkapot sang bisan ano nga pwesto sa gobyerno.
Suno kay Salazar, sa Negros Occidental, ang mga kandidato ang ginhatagan sang 30 ka adlaw humalin sa Election Day agud nga mafile ang ila SOCE sa talatapan sang Comelec.
Magluwas sa Comelec, ang Department of the Interior and Local Government (DILG) ang nagapahanumdom man sa mga kandidato nahanungod sa pagfile sang Statement of Contribution and Expenditures.
