Ginpahayag ni Bacolod City Administrator Atty. Eduard Joseph Cuansing nga nag-umpisa na kahapon ang operasyon sang post-election clean-up committee nga pagtinlo sa syudad gikan sa mga campaign materials kasunod sang 2022 Elections.
Ini ang ginpangunahan sang Department of Public Services (DPS) kag City Engineers’ Office kadungan sang bulig sang IPM Service nga amo ang contractor sa paghakot sang basura sa syudad.
Kabahin man sa proseso ang pagkoordinar sa presidente sang Liga ng mga Barangay kag Sangguniang Kabataan agud nga mabuligan kag mapadasig ang pagpalos sa mga campaign materials partikular na sa mga suludlon nga barangay.
Ginalauman man sang mga ini nga mas mangin madasig ang operasyon kag mabalik na ang normal nga dagway sang dalanon sa syudad ilabi na nga natapos na ang eleksyon.
Wala naman sang pili ang pagpangbaklas kag patas sa bisan ano nga partido.
Paathag ni Atty Cuansing nga responsibilidad sang mga private property owners ang paghimos sang mga campaign materials nga yara sa ila propidad apang mahimo man ini nga mapatigayon sang clean up committee sa pahanugot sang tag-iya.
Panugyan sang City Administrator nga dapat magbulihay ang tanan sa nasambit nga hilikuton para sa syudad.
Ang Post-Election Clean-Up Committee ang nangin pinakauna nga Executive Order nga ginpagwa ni outgoing Bacolod City Mayor Evelio “Bing” Leonardia, matapos ang 2022 Elections.
Kasunod sang proklamasyon sang nagdaog sa lokal nga pwesto sa syudad, si Mayor Bing ang nagapangayo naman sang updates sa kahimtangan sang eleksyon kasubong man sa peace and order.
Ginapakamaayo sini nga nagpabilin nga malinong kag wala sang untoward incidents sa ginpatigayon nga piniliay.
Paathag ni Cuansing nga hands-on sa gihapon kag nagapadayun sa pagserbisyo ang alkalde sa pagtakop sang eleksyon.
Pasalig sang City Administrator nga nagapabilin ang pagfunction sang lokal nga gobyerno kag magapabilin ang pagserbisyo sa publiko sang mga incumbent officials tubtob sa matapos ang mandato.
