Aminado ang city administrator sa syudad sang Bacolod nga apektado sa pagbaylo sang administrasyon ang mga job order (JO) employees.
Paathag ni Atty. Eduard Joseph Cuansing, nga ang mga JO ang partikular nga ginhire sang nagapungko nga alkalde bangod ini ang ila nga kilala kag indi lang bangod sa kinahanglan sang dugang nga manpower.
Ini ang dapat naman nga batunon suno kay Cuansing bangod ini ang reyalidad sang pamulitika.
Welcome naman para sa ila ang impormasyon nga ang mga JO sa Bacolod Traffic Authority Office (BTAO) nga makita nga nagaperform sang maayo, ang ipabilin sang masunod nga administrasyon ni Mayor-elect Albee Benitez.
Nagapati ang abogado nga ini bangod ginahatagan sang balor ang skills sang mga Job Order Traffic Enforcers ilabi na nga mangin usik lang sa resources sang lokal nga gobyerno kun ang panibag-o nga administrasyon ang magahire kag magatraining pa sang panibag-o nga mangin traffic enforcers sa dalanon sang syudad.
Sa pihak nga bahin sa dalagan sang politika, sa pagpungko ni Benitez sa pwesto sa Hunyo 30, kadungan man nga magatakop ang kontrata sang tanan nga mga JO kag mga coterminous contract sa idalum ni outgoing Mayor Evelio “Bing” Leonardia alas-12:00 sang udto sa kaangay nga adlaw.
Suno kay Cuansing kalakip sa mga Co Terminus ang iya pwesto bilang City Administrator kasubong man ang City Legal Officers nga ginhire sang nauna nga administrasyon, kun sa diin sila ang required nga mag-utod sang ila nga koneksyon sa lokal nga gobyerno.
