Ginwelcome sang mga pinuno sang Estados Unidos kag China ang kadalag-an ni Ferdinand Marcos Jr. sa pagka-presidente sang Pilipinas, matapos gindeklarar sang bata sang anay diktador ang kadalag-an kadungan sang iya pagpanguna sa partial kag unofficial tally sang Comelec kag nagpromisa nga mangin pinuno sang tanan nga Filipino.
Gincongratulate ni US President Joe Biden si Marcos Jr. pinaagi sa isa ka phone suno sa statement sang White House kag ginpahayag nga nagalaom ini nga magpadayon ang maayo nga relasyon sini sa Pilipinas, ang madugay na nga treaty ally sang Washington.
Suno kay Biden, luyag sini nga i-expand ang bilateral cooperation sa madamo nga mga issues lakip na ang COVID-19 pandemic, krisis sa klima, economic growth kag respeto sa tawhanon nga kinamatarong.
Nakighinun-anon man si Chinese President Xi Jinping kay Marcos Jr. sang Miyerkules suno sa Chinese state television kun sa diin ginhighlight sang Chinese leader nga ang duha ka pungsod ang nangin “partners through thick and thin”.
Suno kay Xi, nakit-an sini ang dako nga importansya sang pagdevelop sang relasyon sang China kag Pilipinas kag willing ini nga magtukod sang maayo nga working relationship kay President-elect Marcos, kag ipadayon ang pag-abyanay sang duha ka pungsod.
Ang Pilipinas ang nagapungko sa atubang sang tensyon sa tunga sang US kag China.
