Ginakabig nga maayo para sa pungsod sang tagpamaba sang 3rd Infantry Division ang pagpatuman sang military service sa Pilipinas.
Sa interview sang Bombo Radyo kay Captain Kim Apitong, sa karun wala pa sang resolusyon, layi ukon mandato sa Armed Forces of the Philippines tuhoy diri bangud ang mga legislator amu ang nagahimo sang hagna.
Apang suno kay Apitong, kun ipatuman gid man ang military service, daw kaangay ini sa South Korea nga duha ka tuig ang kalawigon.
Kun ilakip naman ini sa ROTC, nga madugay na nga ginapasanyog kag ginakay-o sa mga kolehiyo kag unibersidad, ini ang patigayunon sa mga trainings sang mga estudyante.
Sa karun suno sa iya, wala pa sang ihibalo kun ano gid man ang mga igapatuman sa idalum sang military service apang ginakabig niya ini nga maayo para sa pungsod.
Suno diri, mangin preparado ang mga pumuluyo sa pagpakigbato para sa pungsod in kaso nga may mga gyera kag makadugang man sa ihibalo sa mga rescue operations.
Suno kay Apitong, kun ini ang matigayon, makaangkon ang pungsod sang health kag mas madamo nga skills nga makuha sa bahin sang seguridad in kaso nga may matabo sa Pilipinas.
