Gin-athag ni Atty. Renecito Novero nga wala sang layi nga ginalapas ang mga estudyante sang University of the Philippines nga nagaupod sa hublag protesta sa atubang sang Commission on Elections kasunod sang eleksyon sang Lunes.
Nahibaluan nga nagtipon ang mga nagkalain-lain nga grupo lakip na ang mga estudyante sa University of the Philippines Diliman kag Manila agud ipabutyag ang ila sentimyento sa obserbasyon nga mahimo may yara sang dinayaay sa eleksyon.
Sa interview sang Bombo Radyo kay Novero, maathag sa 1987 Philippine Constitution nga hilway ang mga estudyante nga magrally agud magpabutyag sang ila sentimyento kaangay sang mga ginahimo sang mga estudyante sa UP.
Suno diri, nagapabutyag ang mga estudyante sang ila panan-awan sa mga hitabo nga sa ila paglantaw, makaapekto sa ila sa ulihi.
Suno kay Novero, wala sang ginalapas nga layi kundi translation lamang sang constitutional right ang ila ginahimo.
Aminado ang konsehal sang Bacolod nga maalam ang mga estudyante sa nasambit nga unibersidad kag sa pagkamatuod, indi mahapos ang admission sa nasambit nga eskwelahan.
Nahibaluan nga ang nakapasar lamang sa UP College Admission Test ang makaeskwela sa national university. Bangud wala nagalapas sang anuman nga layi ang mga estudyante nga nagaupod sa hublag protesta, indi man sila pwede maaresto.
Suno kay Atty. Renecito Novero, wala sang layi nga nagamandu sa mga estudyante ukon sin-o man nga Pilipino nga magkuha anay sang permit antes makapatigayon sang protesta ukon magmartsa sa dalan agud mapabutyag ang sentimyento batok sa gobyerno.
Suno diri, nagakuha sang permit bilang pagrespeto sa local government unit kag ini ang ginahatag man gilayon apang indi na kinahanglan ang permiso kun magmartsa sa dalan, magluwas lang kun may dako nga assembly sa isa ka public place nga sakop sang LGU.
Suno kay Novero, indi krimen ang pagpabutyag sang sentimyento, magluwas lang kun ini ang libelous ukon nagahalit na sa iban.
Ang pagpabutyag sang sentimyento suno sa iya ang indi lamang constitutional nga derecho kundi isa man ka duty nga mag-express sang dapat ipahibalo sa pumuluyo kag gobyerno sang husto nga butang.
Suno sa konsehal sang Bacolod, indi pwede matabog ang mga protesters sa lugar nga ila ginatipunan kun wala sila nagahimo sang krimen, sa baylo ang nagatabog sa ila ang sarang mangatubang sang kaso kriminal nga coercion.
Kun nag-engage naman sila sa physical acts nga makahalit sa iban, indi na ini kabahin sang freedom of expression kundi liable na sa paghimo sang krimen.Samtang wala nakita ni Atty. Renecito Novero nga legal ground ang pagprotesta sang mga estudyante agud nga buhinan ang pondo sang University of the Philippines kag ideprive ang mga Iskolar ng Bayan sang subsidy.
Ini ang kasunod sang pahayag sang religious leader nga si Pastor Apollo Quiboloy nga untaton nalang ang subsidy sang gobyerno sa UP kag ini ang siraduhon bangud nagarally ang mga estudyante sa atubang sang Commission on Elections kasunod sang piniliay.
Sa interview sang Bombo Radyo kay Novero, ang UP ang naga-exist bangud sa buwis nga ginabayad sang mga Pilipino kun sa diin kabahin sang taxpayers ang ginikanan sang UP students.
Kun lantawon suno sa konsehal, maayo nga makit-an nga ginapakita sang mga estudyante ang ila responsible participation sa panghimanwa sa huben nga paminsaron.
Ang mga estudyante suno sa iya ang nagapakita lamang nga wala sila nagahipos kun may nakit-an sila nga sala.
Suno kay Novero, indi senyales sang rebelyon ang expression sang sentimyento kag pagdemand sang rectitude. Sa pihak Kinahanglan sang isa ka legislative measure agud nga mapasirado ang University of the Philippines, kag indi lamang base sa pagmartsa sang mga estudyante sa dalan.
Ang UP ang gintukod sang June 18, 1908 paagi sa ratification sang Act No. 1870 kag sa karon, may yara sang walo ka constituent universities sa bilog nga UP system sa Luzon, Visayas kag Mindanao.
Suno kay Bacolod City Councilor Renecito Novero, ang anuman nga gintukod sang kasuguan ang mabungkag lamang sang isa man ka kasuguan.
Apang ini ang malain nga precedent suno kay Novero bangud kun mapasira ang UP, wala man sang rason agud indi mapasira ang iban nga unibersidad.
Ang nagalantaw sang puro negatibo tuhoy sa UP ang tuman na gid ka negatibo bangud madamo ang produkto sang national university nga nakahatag sang benepisyo kag bulig sa nagkalain-lain nga sanga sang gobyerno sang Pilipinas.
Naintindihan naman ni Novero ang panan-awan ni Pastor Apollo Quiboloy tuhoy sa UP students kag wala sini nahangpan ang sitwasyon bangud mahimo nga wala ini sang background ukon nakaeskwela sa unibersidad nga kaangay sini ukon tuman ang advocacy sini angot sa kalinong.
