Gin-appoint na bilang bag-o nga general manager sang Bacolod City Water District (BACIWA) si anay Board of Director Mona Dia Jardin.
Sa interview sang Bombo Radyo Bacolod kay Jardin, ginpahayag sini nga siya ang gin-appoint sang tinalikdan nga Mayo 13 santo sa desisyon sang mga Board of Directors.
Suno diri, ang anay nagapungko bilang acting General Manager nga si Engr. Michael Soliva ang magabalik naman sa anay pwesto sini bilang Head sa Technical Department sang Contract Monitoring Unit sang BACIWA.
Si Soliva ang nagpungko bilang General Manager sa sulod na sang masobra isa ka tuig matapos nga mabakante ang pwesto sang magretire si anay BACIWA General Manager Juliana Carbon sang Nobyembre 2020.
Antes pa man ini gin-appoint sang tinalikdan nga Biyernes, nauna na ini nga nagsumiter sang resignation sa pwesto bilang Board of Directors sang Mayo 5.
Suno diri magalabay pa sa madamo nga mga proseso ang magabulos sa iya pwesto bilang Board of Director.
Sa karun ang BACIWA ang may-ara nalang sang ginabanta 30 ka empleyado nga ginalakipan sang 18 ka regular employees kag ang nabilin ang mga casual employees.
Ang pribado nga kompanya nga Prime Water Incorporated naman amo ang incharge sa operations kag ang BACIWA ang nagamonitor nalang sa performance sang kompanya.
Bilang bag-o nga General Manager, focus sini nga makadugang sang water source nga sa karun ginaproseso na.
Suno kay Jardin, narehabilitate na sang Prime Water ang mga pipe line nga ginalabayan sang tubig gani sa pagdugang sang water source indi na ini mahulog sa wastage indi kaangay sa nagakatabo sadto nga tuga sang mga leakage.
