Pilason ang isa ka 23-anyos nga lalaki matapos ginluthang sa isa ka baylehan sa Public Plaza sang Barangay Washinton, Escalante City sang Mayo 17 sang kaagahon.
Sa interview sang Bombo Radyo kay Police Corporal Seanlin Nueva, investigator sang Escalante City Police Station, ginkilala ang biktima kay John Mark Quambot, 23-anyos residente sang nasambit nga barangay samtang ang suspetsado amu si Ace Lobaton, legal ang edad kag residente sang Barangay Old Poblacion, Escalante City.
Suno kay Nueva, samtang yara sa baylehan ang biktima bangud nagaselebrar sang piesta ang Barangay Washinton, hinali lamang nga ginluthang ni Lobaton si Cambot sang lima ka beses gamit ang caliber .45 pistol.
Gilayon naman nga nagpalagyo ang suspetsado kag sa karun nagapadayon pa sang hot pursuit operation ang kapulisan.
Magluwas kay Cambot, may isa man ka witness nga napilasan.
Naigo naman sa kamot si Cambot kag daplis sa lawas kag gilayon nga gindala sa ospital apang malayo naman sa katalagman.
Sa karun ginahibalo pa ang motibo sang krimen.
Magapangatubang naman ang suspetsado sang kaso nga frustrated murder.
