Isa na ang narekord nga patay sa Barangay Singcang Airport, ciudad sang Bacolod bangud sa dengue.
Ang Barangay Singcang ang nagapanguna sa 61 ka mga barangay sa ciudad sa may pinakamadamo nga kaso sang dengue nga nagdangat sa 14 halin sang bulan sang Enero tubtub una nga semana sang bulan sang Mayo.
Sa interview sang Bombo Radyo kay Punong Barangay Rosinie Distrito, sang Pebrero napatay ang 11-anyos nga bata nga lalaki nga nagapuyo sa airport area.
Bangud diutay pa lang ang eskwelahan nga nagapatigayon sang face-to-face classes sa karon, mahimo suno ky Distrito nga sa balay mismo nakadtan sang lamok ang bata.
Nagpanawagan si Distrito sang kooperasyon sang tanan agud indi na madugangan ang napatay bangud masakit ini para sa pamilya.
Indi pa man matumod kun may iban pa nga gin-dengue bangud mahimo nga may iban nga wala lang nagpakonsulta.Aminado naman ini nga ginaagwanta nalang sang iban nga pumuluyo ang trangkaso bangud sa kahadlok nga magpacheck up kun sa diin ginapaidalom sa antigen test ang pasyente.
Apang naghinyo si Rosinie sa mga ginikanan nga temprano pa ipacheck up ang miyembro sang pamilya nga ginatrangkaso ilabi na ang mga kabataan bangud dako ang bulig sang early consultation.
Suno sa punong barangay, sarang makapakonsulta sa Barangay Health Center ukon sa City Health Office kun ginakabos sa kwarta. Samtang, isa naman ang napatay sa Barangay Sum-ag diri sa ciudad sang Bacolod bangud sa balatian nga dengue.
Sa interview sang Bombo Radyo kay Punong Barangay Rodney Carmona, nagaistar sa Purok Candelaria ang 17-anyos nga lalaki nga napatay tinalikdan nga bulan.
Suno diri, manubo na ang platelet sang pasyente sang nag-abot ini sa ospital gani malala na ang sintomas kag wala na natabangan.
Ginpatigayon naman sang fogging sa mga lugar nga ginaistaran sang mga nadegue kag nanagtag man sang kiti-kiti powder agud mabutang sa posible nga breeding places sang lamok.
Suno kay Carmona, nagalibot ang mga barangay health workers agud manghatag sang kiti-kiti powder.
Nagpanawagan man ini sa mga pumuluyo nga magpakonsulta sang temprano kun ginahilanat ukon ginatrangkaso agud madiagnose ang ila ginabatyag.
