Tuman naman ang pagpasalamat sa Ginoo sang mga ginikanan ni Rogen Ladon matapos sini nadepensahan ang iya titulo sa men’s flyweight division kag magapauli sang bulawan nga medalya.
Si Ladon, tumandok sang Bago City, Negros Occidental, ang naglutos kay Tran van Thao sang Vietnam sa Bac Ninh Gymnasium kahapon.
Sa interview sang Bombo Radyo sa iloy sini nga si Joy Ladon, wala ini naglantaw sang hampang bangud siya ang ginakulbaan para sa iya bata.
Suno sa iya, wala untat ang iya pagpangamuyo nga ubayan sang Ginoo si Rogen kag himun-an sang kusog, kabakod kag kaisog.
Sang nagdaog na ang iya bata, halo nga kulba kag kalipay ang iya nabatyagan kag wala untat ang pagpasalamat sini sa Ginoo.
Magapauli naman sang bronze medal sanday Palicte kag Pasuit matapos nalutos sang Huwebes sa semi-finals.
Si Palicte, nga amu ang light welterweight regional champion, ang nalutos kay Farrand Papendang sang Indonesia samtang ang 2019 SEA Games lightweight silver medalits nga si Pasuit ang napierde man kay Vuong Thi Vy sang Vietnam.
