Ginpasalig sang commander sang Philippine Coast Guard Station Northern Negros Occidental nga may mga ginapatigayon sila nga mga preparasyon agud nga malikawan ang mga insidente kaangay sang pagkasunog sang mga barko samtang nagalayag sa kadagatan.
Ini ang kasunod sang pagkasunog sang fastcraft vessel nga MV MERCRAFT 2 sa Real, Quezon kahapon.
Sakay sang barko ang 124 ka mga pasahero kag 10 ka crew kun sa diin masobra 20 ang nasamaran kag may nabilin pa nga missing.
Suno kay Coast Guard Commander Joe Luviz Mercurio, may mga procedure nga ginapatuman antes pahanugutan nga makalayag ang barko nga gina-obserbar sa bilog nga Pilipinas.
Bilang kabahin sang security and safety procedures, may ginapatigayon ang mga ini nga safety departure inspection.
Gikan diri, may-ara sang checklist nga ginaprescribe ang higher authority sang PCG kalakip na sa mga equipments nga dapat makita sa barko, integridad sang barko sa pagbyahe kag ang competence sang mga crew.
May ginapatigayon man nga Emergency Readiness Evaluation kada tuig.
Apang apisar sa mga preventive measures, indi malikawan nga may-ara gid sang mga isolated nga mga insidente kaangay sang natabo sa fastcraft vessel sa Quezon Province.
Pasalig naman ni Mercurio nga ang mga preparasyon ang may tinutuyo nga mapanubo ang risgo sa pagluntad sang mga kaangay nga insidente sa lawod.
Pahanumdom man sang Coast Guard Commander sa mga pasahero nga indi magpanic sa kaangay nga mga insidente bangod masami nga nagakadula ang presence of mind kun nagapanic.
Pahanumdom man sini nga magpamati sa mga instruction sang master of the vessel nga amo ang incharge sa pagseguro sang kahilwatan sang mga indibidwal nga sakay sang barko.
Nagapati naman si Mercurio nga ang mga crew sa mga barko ang train kag may ikasarang sa pag-assist sang mga pasahero sa kaangay nga mga sitwasyon.
