Nagsapol kahapon ang Negros Occidental Provincial Health Office sa pagpanguna ni Dr Ernell Tumimbang kag ang mga City and Municipal Health Officers sa probinsya agud istoryahan ang mga tikan agud mapunggan ang nagasaka nga kaso sang dengue nga sa karun yara na sa “Alert Level”.
Nahibaluan nga ang Negros Occidental amo ang may pinakamataas nga kaso sang dengue sa bilog nga Western Visayas.
Santo sa Department of Health (DOH) Western Visayas as of January 1 tubtob May 14, ang kaso sang dengue sa bilog nga rehiyon ang nagdangat na sa 1,355 kun sa diin 19 ang na ang gindulaan sang kabuhi.
Samtang ang Negros Occidental naman ang nakarecord na sang 518 ka mga kaso kag lima ang nagkalamatay.
Ini ang 205 porsyento nga mas mataas kun ipaanggid sa dengue cases sang 2021 sa kaangay nga period.
Sang damlag lang, sa Morbidity Week No. 19 humalin Mayo 8 tubtob 14, ang Negros Occidental ang nakarecord sang 70 ka panibag-o nga kaso kag may duha na nga ginbawian sang kabuhi.
Samtang 44 naman ang dengue cases sa Antique kag 22 ang sa Iloilo province.
Suno kay Dr. Tumimbang, nga yara na ang probinsya sa Alert Level sa kaso sang dengue.
Ginakahangaw-an sang Provincial Health Officer nga kun magsegi ang pagsaka sang kaso magasaka na sa epidemic level ang status sini sa probinsya.
Isa sa ginpanugyan ni Tumimbang amo ang pag-activate sang dengue task force sa kada banwa kag syudad sa probinsyahan nga umpisa nga gintukod sadtong 2017.
Magluwas sa mga banwa kag syudad, may dengue task force man sa Provincial level gani dapat nga ang mga ini ang may kooperasyon kag palarehas ang implementasyon.
Pinaagi sini, malimitahan ang numero sang mga nagakadulaan sang kabuhi bangod sa dengue.
