Aminado ang election officer sang Bacolod nga kinahanglan ni Mayor Bing Leonardia nga pamatud-an ang mga akusasyon nga ginlakip sini sa electoral protest nga iya ginfile sa Commission on Elections Central Office.
Sa interview sang Bombo Radyo kay Atty. Revo Sorbito, aminado ini nga indi siya makahatag sang komento sa merito sang kaso bangud wala niya ini nakita kag pending naman ang reklamo.
Suno diri, ang mga indibidwal nga ginpaboto sang Board of Election Inspectors amo lang ang nalakip sa voter’s list.
Suno kay Sorbito, indi makaboto ang iban nga tawo bangud may yara sang litrato sa voter’s list kag ginapangayuan man sang valid ID agud maverify.
Wala naman sang labot ang Comelec Bacolod sa electoral protest magluwas lang kun maghatag sang instruction ang central office.
Angot sa akusasyon nga may massive vote buying, ginpahayag ni Sorbito nga wala man sang nadakpan ang Comelec kag Philippine National Police nga may nagpamakal sang boto.
Magasabat naman ang respondents sa reklamo ni Leonardia.
Sa karon, ang ballot boxes ang yara sa kustodiya sang Treasurer’s Office bangud sila man ang may kontrol sini.
