Bisan ang retailer sang bugas sa Bacolod ang aminado nga dapat hatagan sang gobyerno sang ayuda ang mga manugtanom sang humay agud matuman ang handom sang Marcos administration nga panubuon sa P20 tubtub P30 ang kada kilo sang bugas sa merkado.
Sa interview sang Bombo Radyo kay Ramon Dago Jr. nga nagaretail sang bugas sa Burgos Public Market, mahina ang baklanay sang bugas sa karon, indi kaangay sang wala pa ang pandemic.
Suno diri, diutay lang ang nagabakal subong sang isa ka sako nga bugas kundi kalabanan ang nagabakal sang kinilo nalang.
Nagapati si Dago nga mahimo nadulaan sang trabaho ang iban nga empleyado gani apektado man ang inugbakal nila sang bugas.
Ang mabakal sa karon amo ang tag-P40 nga bugas samtang imported naman ang nagabili sang P42 tubtub P44.
Suno sa rice retailer, dapat indi makalab-ot P1,000 ang bili sang kada sako kun gusto sang gobyerno nga ipatuman ang P20 tubtub P30 kada kilo.
Kinahanglan man suno sa iya nga panubuon ang presyo nga tanyag sang mga traders kag hatagan sang gobyerno sang ayuda ang nagatanom sang humay agud indi sila mamierdihan.
Aminado si Dago nga madugay pa antes matuman ang plano sang gobyerno apang magatuman man lang sila kun ano ang mandu.
