Nagalaom ang sugar industry leaders sa Negros Occidental nga may pag-ulikid sa mga sugarcane workers ang secretary sang Sugar Regulatory Administration nga pilion ni President-Elect Ferdinand ‘Bongbong’ Marcos Jr.
Suno kay Manuel Lamata, presidente sang United Sugar Producers Federation (UNIFED), may ideya si Bongbong Marcos sa patag sang agrikultura gani nakahibalo ini sang ila kahimtangan.
Ginaduso sang mga ini nga islan ang administrator sang Sugar Regulatory Administration bangud indi sila komporme kay Hermenegildo Serafica.
Ang masunod nga SRA suno kay Lamata ang dapat nga pabor sa mga sugarcane farmers, pro-BBM, pro-consumers kag pro-traders bangud indi mahimo nga wala ini nagaulikid sa mga nagatanom sang tubo.
Mas maayo man suno kay Lamata kun nagikan sa Negros Occidental ang masunod nga SRA administrator bangud 65 porsyento sang kalamay sa Pilipinas ang ginaproduce sang probinsya.
Mas mahapos man suno sa iya kun taga-Negros Occidental ang SRA head bangud mahapos lang ini lab-uton.
Kun hatagan naman sang tsansa nga makapalab-ot sang concern kay Marcos, luyag ni Lamata nga mapalab-ot ang problema angot sa pagsaka sang presyo sang diesel kag abono – duha ka factors nga nagabug-at sang palas-anon sang sugarcane farmers.
Suno kay Lamata, kinahanglan nga mapangitaan sang paagi sang gobyerno nga may baklan sang barato nga diesel kag abono ang mga nagatanom sang tubo.
