Nagpatigayon sang informal oath taking ceremony si Bacolod City Mayor-elect Albee Benitez kahapon sang aga sa atubang sang Punong Barangay sa Singcang-Airport kaupod kag Congressman Greg Gasataya kag tatlo ka mga nakasulod nga konsehal sa idalum sang Team Asenso.
Paathag ni Benitez nga nagdesisyon ang Team Asenso nga magtake-oath sa atubang ni Punong Barangay Rosenie Distrito bangod matapos nahibaluan nga sa nasambit nga barangay ang may pinakamataas nga vote margin nga nabatun ang Team Asenso partikular na sanday Benitez kag Gasataya.
Kaupod sang Mayor-elect kag reelected Congressman sa pagpanumpa sanday Councilor-elects Jason Villarosa, Vladimir Gonzalez kag Simplicia Distrito.
Aminado man si Benitez nga indi sila kompleto bangod may iban sa ila nga nag-out of town.
Paathag naman ni Benitez nga ang pagpanumpa sa Barangay Singcang-Airport ang pagpakita lang nila sang pagpasalamat sa mga pumuluyo sang Barangay sa nangin pinakamataas nga average number of votes sa bilog nga syudad sang Bacolod kun sa diin si 5,662 votes ang nabatun ni Benitez samtang 7,247 votes naman ang kay Gasataya.
Pasalig naman ni Benitez nga magluwas sa ginpatigayon nga informal oath taking sa Barangay, may-ara pa sila sang patigayunon nga pormal nga pagpanumpa sa Hunyo 30, antes ang pag-assume sa pwesto.
