Magluwas sa plano nga pagrepurpose sang P800 million project nga coliseum construction sa syudad sang Bacolod kabahin man sa ginatuktukan ni Mayor-elect Albee Benitez ang mga mayor nga merkado, guba nga dalanon kag ang spaghetti wires nga lapnagon sa syudad.
Pahayag ni Bacolod City Mayor-elect Albee Benitez nga ginkadtuan na sang mga ini ang pila ka mga existing nga proyekto sa syudad agud mahibaluan kun ano na ang status sang mga ini kag kun ano pa ang dugang nga mahimo.
Si Benitez ang may-ara sang 8-point agenda sa iya nga administrasyon kag nalakip diri ang pagkay-o ukon pagpatahom sang tatlo ka mga mayor nga merkado sa syudad.
Suno diri, sa iya nga paglibot nakita sini nga kinahanglan nagid nga ma-overhaul ang mga merkado.
Ang transition team sang Team Asenso sa pagpanguna ni Bacolod City reelected Congressman Greg Gasataya ang sa karun nagapangita sang mga pinaka-kwalipikado kag may commitment sa pagserbisyo nga mangin kabulig sang administrasyon kag magapamuno sa pila ka mga sektor sang syudad.
Samtang kalakip pa sa 8-point agenda sang Benitez Administration ang pagkay-o sang lapnagon nga spaghetti wires sa linya sang kuryente.
Paathag sang Mayor-elect nga nagapakig-angot naman ang mga ini sa mga Telecomunication Companies kag Cable Companies, kag ang mga ini ang nagpasalig na sang kooperasyon.
Kasubong man nga kalakip sa commitment sini ang pagtukod sang mga solar lights kag pagkay-o sang mga dalan padulong sa mga subdivision kag iban pa nga mga lugar.
