Liwat nga ginpanawagan ni Bacolod City Mayor-elect Albee Benitez sa kampo ni outgoing Mayor Evelio “Bing” Leonardia nga magmove-on na nkag batunon ang resulta sang eleksyon.
Suno kay Benitez, sa ginabuhat ni Leonardia kaangay lang nga ginadugangan sini ang kasakit nga iya ginabatyag dala sang kamatuoran.
Panugyan sini nga dapat nga magmove-on na bangod natapos na ang eleksyon kag damo pa sang trabaho nga dapat atubangon.
Panindugan ni Benitez nga sa pagfile palang sini sang Certificate of Candidacy, maathag na kun ano ang panawagan sang mga tawo, kag ini ang pagdala sang pagbag-o sa syudad sang Bacolod.
Sa pihak nga bahin maykaangtanan sa Election Protest nga ginfile ni Leonardia sa Commission on Election (Comelec) National Office, pasalig ni Benitez nga sang May 9 Elections, parehas nga may watchers ang Team Asenso kag Grupo Progresa sa kada presinto.
Ang mga ini ang nagserbe nga overseer sa pagpatigayon sang eleksyon.
Panindugan ni Benitez nga kun matuod ang alegasyon sang fake voters, kuntani sa tion palang sang piniliay, ginpunggan na ang mga ini sang mga watchers.
Dugang pa sini nga bisan ang Comelec Bacolod ang nagpahayag nga imposible nga may fake voters ilabi na nga may litrato sang botante sa listahan sang mga registered voter’s kag ini ang ginatsekyar antes ginapahanugutan sa pagboto.
Pahayag ni Benitez nga para sa iya, ang May 9, 2022 Elections amo na ang pinaka-orderly nga eleksyon nga iya na-eksperyensyahan.
Sa Hunyo 30, opisyal na nga maga-assume sa pwesto sa Mayor-elect Albee Benitez nga amo man ang pagpanaog sa pwesto ni Mayor Bing Leonardia.
