Apat ka mga doktor nga nagatrabaho sa mga ospital nga ginapadalagan sang Negros Occidental Provincial Government ang ginreklamo sa Department of Health (DOH) Regional Office 6.
Ini ang ginpalab-ot naman sa igtalupangon sang Provincial Administrators Office.
Suno kay Provincial Administrator Atty Rayfrando Diaz, ang mga complaint ang lunsay bangod sa indi maayo nga pagtratar sang mga nasambit nga doktor sa pasyente.
Wala na ginhingadlan ni Atty Diaz ang nasambit nga mga doktor, apang pasalig sini nga ila paga-imbestigahan ang kaso.
Paathag sang Provincial Administrator nga bangod public service ang trabaho sang mga doktor sa public hospitals sang probinsya, wala sang dapat nga mangin problema ang mga empleyado sa mga pumuluyo nga ginaserbisyuhan.
Aminado si Diaz nga may mga doktor kag bisan pa Hospital Heads nga wala nagatrabaho sang husto.
Ginakasubo naman ini sang Provincial Administrator ilabi na nga dalagko ang ginapasweldo sang probinsya sa mga ini.
Suno diri, indi patas nga ginaswelduhan ang mga ini sang dako para maghatag sang public service apang indi man maayo ang pagtratar sa ila nga mga pasyente.
Isa pa sa halimbawa ni Diaz ang mga doktor nga kaangay nga wala sang balatyagon kun sa diin bisan nadulaan na sang palangga sa kabuhi ang isa ka pamilya, ila pa nga gina-akigan.
Sa mga kaso nga nagadangat sa DOH region 6, magluwas sa indi maayo nga pagtratar sa mga pasyente, may-ara man sang tuga sang corrupt practices kaangay sang pagbaligya sang bulong sa sulod sang ospital.
