Kadungan sang pagpabilin sang syudad sang Bacolod sa Alert Level 1, nagpanugyan ang deputy for medical sang Bacolod Emergency Operations Center nga sundon sa gihapon ang mga minimum health protocols batok sa COVID-19.
Sa interview sang Bombo Radyo Bacolod kay Dr. Chris Sorongon, pareho lamang ang guidelines nga sundon magluwas nalang sang pagbatak ni Bacolod City Mayor Evelio “Bing” Leonardia sang curfew hours sa syudad sang Bacolod.
Madumduman nga sang Miyerkules, gin-anunsyar ni Bacolod City Mayor Evelio Leonardia nga makaligad ang duha ka tuig, batakon na ang curfew hours sa ciudad.
Si Leonardia ang nag-issue sang Executive Order 25 nga napetsahan Mayo 24 nga naga-repeal sang una nga direktiba nga nagtalana sang curfew halin alas-12:00 sang tungang gab-i tubtub alas-4:00 sang kaagahon.
Suno kay Leonardia, kinahanglan nga mapahalog na ang hulag sang mga tawo bilang kabahin sang recovery plans sang ciudad.
Sa pihak sang paghalog sang curfew hours nagapaandam lamang si Sorongon sa mga pumuluyo ilabi na ang nagatambong sang face to face graduation nga dapat ang mga fully vaccinated lamang agud nga wala sang risgo.
Suno diri highly encouraged nga mga bakunado lamang ang magatambong sa face to face graduation bangud mahimo nga may asymptomatic nga nakatambong sa nasambit nga kahiwatan kun sa diin yara sa high risk ang indi bakunado.
Gina-engganyo man sini ang mga school authorities nga hugot nga ipatuman ang minimum health protocols sa tion nga magpatigayon sang face to face graduation.
Suno kay Sorongon dapat maghalong ang tanan agud nga magpadayon na nga Alert Level 1 ang syudad sang Bacolod.
