Aminado ang anay deputy city director for operations sang Bacolod City Police Office nga kinahanglan ibalik ang patriotismo sang mga Pilipino bangud amat-amat na ini nga nagakadula.
Sa interview sang Bombo Radyo kay Retired Police Col. Armando Tubbongbanua, nalipay ini nga may yara sang selebrasyon sang National Flag Day kada Mayo 28.
Suno kay Tubongbanua, may pagpalangga sa Pilipinas ang matag-as nga opisyales sang pungsod kun sa diin nagsugod ang selebrasyon sa tion ni anay Presidente Ferdinand Marcos apang halos wala na nahatagan sang atensyon ang importansya sang hayahay.
Sang nagtuhaw ang COVID pandemic, indi naman malipod nga madamo nga health workers ang nagresign sa trabaho bangud sa manubo nga sweldo.
Apang kun dako ang pagpalangga sang mga nagresign sa Pilipinas, mahimo suno sa iya nga ginpasulabi nila ang pagserbe sa tion sang gyera.
Indi naman malipod suno sa iya nga kun kaisa, may mga establisyimento nga indi makahibalo magdisplay sang hayahay sang maayo.
Suno kay Tubongbanua, kun vertical ang flag, ang blue ang yara sa nawala kun nagaatubang ang viewer samtang yara naman ini sa ibabaw kun horizontal ang flag ukon yara sa ibabaw sang flagpole.
Nagahibubun-ot man si Tubongbanua sa pagdula sang mandatory Reserve Officers Training Corps kun sa diin indi makahibalo ang mga pamatan-on mag-uyat sang rifle kag manubo na ang patriotismo sang mga Pilipino.
Suno sa former BCPO official, kinahanglan sang mga Pilipino nga maghugpong agud wala nagabinahin-bahin ang nasyon.
