Pilason ang isa ka negosyante matapos naluthangan sa isa ka hold-up incident nga nagluntad sa ciudad sang San Carlos kun sa diin masobra P120 mil nga cash ang nakuha sang wala pa makilal-an nga suspetsado.
Sa impormasyon nga nakuha sang Bombo Radyo, ginkilala ang mga biktima sanday Joani Marquez, 42 anyos, isa ka saleswoman kag residente sang Barangay Mansilingan, Bacolod City kag Aladin Alcorin, 42-anyos, isa ka negosyante sa Barangay Prosperidad Proper, San Carlos City.
May gindeliver si Marquez sa balaligyaan ni Alcorin sang hinali lamang nagpalapit ang suspetsado nga nagasuksok sang pula nga sweatshirt kag jeans kag ginhablot ang bag ni Marquez.
Ini ang nagaunod sang P121,029 nga cash lakip na ang iya sales collection kag personal nga kwarta; ATM card kag mga identification cards.
Samtang, ginbuligan naman ni Alcorin si Marquez kag hinali lamang ini nga gintiro sang suspetsado gamit ang unidentified nga armas-luthang.
Naigo si Alcorin sa nawala nga bahin sang tiyan kag nakaangon sang minor nga pilas.
Gilayon naman nga nagpalagyo ang suspetsado kag nag-angkas sa isa ka motorsiklo padulong sa Barangay Quezon Road.
Ang driver sang motorsiklo ang nagasuksok sang orange nga t-shirt.
Sa karun nagapadayon pa ang hot pursuit operation sang kapulisan.
