Ginpanindugan sang Secretary General sa United Negros Drivers and Operators Center (UNDOC) indi sila gihapon makapalawig sang oras sang byahe sa mga Public Utility Jeepneys (PUJs) apisar pa nga ginlift na ang curfew sa syudad sang Bacolod.
Suno kay Diego Malacad, tubtob gihapon alas-7:00 sang gab-i ang byahe sang mga Jeep kag tayog na ang alas-10:00 sang gab-i.
Nahibaluan nga nag-ayo ang Metro Bacolod Chamber of Commerce and Industry (MBCCI) nga kun mahimo ma-extend ang byahe sang mga PUJs sa syudad bangod wala na sang curfew.
Apang panindugan ni Malacad nga indi na ini produktibo para sa nga Jeepney drivers bangod malaka na ang ila mapick-up nga pasahero.
Paathag sini nga kalabanan sang mga nagatrabaho sa gab-i kaangay sang call center agents ang may kontrata na nga mga van agud mangin service sa trabaho kag ang iban ang sa trabaho na naga-overnight.
Bangod sini, pahayag ni Malacad nga wala gid sang dako nga epekto sa ila ang paglift sang curfew bangod indi man sila gihapon makabyahe sa gab-i.
Dugang pa sini nga tuman ka dako ang pagsaka sang presyo sa gatong gani pierde ang mga ini kun sila ang magabyahe apang limitado lang ang masakay nga pasahero.
Suno diri, ang Jeepney Drivers ang may basic lang nga kita kaangay sa mga vendors.
Aminado naman ini nga ang pahayag ni MBCCI Chief Executive Officer Frank Carbon nga may pagdugang sa income sang paglift sang curfew ang epektibo lang sa mga negosyo nga naga-operar kun gab-i kaangay sang mga ilimnan kag restaurant apang wala diri nalakip ang Jeepney Terminals.
Apang may pila man ka ruta suno diri nga may nagabyahe sang 24 oras kaangay sa Barangay Sum-Ag kag Barangay Banago kun sa diin may-ara sang mga nagadeliver sang produkto ukon nagapangumpra sa mga merkado.
