Nakighinun-anon na si Mayor-elect Albee Benitez sa mga manunudlo sa pampubliko nga eskwelahan sa siyudad sang Bacolod.
Suno kay Bacolod City Public School Teachers Federation President Richard Gelangre, nagreach-out ang Mayor-elect kag ginhibalo kun ano ang mga concerns sang mga public teachers.
Isa sa ila nga gindangop sa masunod nga alkalde amo ang pagdugang sa ecola sang mga manunudlo ilabi na nga madugay naman ini nga wala nadugangan.
Suno kay Benitez ang pagpasaka sang e-cola sa mga manunudlo ang kabahin na sa mga ginbuy-an sini nga promisa sa iya nga pagkampanya.
Sa karun, inalantaw nga ini ang pagatun-an pa sang dugang tubtob sa makapungko na sa City Hall ang incoming Mayor.
Sa bahin naman sang ikaayong lawas sang mga manunudlo, ginalantaw sang Mayor-elect nga mahimuan sang paagi agud nga ang mga manunudlo nga nagakinahanglan sang medical attention ang derekta nalang nga makapa-ospital nga wala sang pagaproblemahon nga balayran pinaagi sa pagpakig-angot sini sa PhilHealth.
Sa pihak nga bahin ginkakibot naman ni Benitez sang mahibaluan nga mayorya sang mga manunudlo ang may below standard nga sweldo kun sa diin yara nalang sa P5,000 ang ila nga take home pay.
Bangod sini, luyag sang Mayor-elect nga makahuman sang Financial Literacy.
Isa pa sa plano sang Mayor-elect amo ang pagtukod sang teacher’s village.
Una sini nga ginhibalo ang kahimtangan sa mga puluy-an sang mga manunudlo kag nahibaluan sini nga mayorya sa mga Public School Teachers ang wala sang kaugalingon nga balay.
Tuyo ni Benitez nga magpadulong sa Manila agud nga makighinun-anon sa mga incoming officials sa masunod nga administrasyon nga yara sa National Positions agud nga matukuran sang balay ang mga manunudlo nga wala pa sang kaugalingon nga puluy-an.
Nahibaluan nga proyekto man sadto sang amay ni Benitez ang pagtukod sang mga Housing Projects.
Sa bahin naman sang blended learning, ginsuggest man sa ila nga pagsapol ang paggamit sang Smart Blackboard nga una gin-endorso ni Benitez sang 2011.
Paathag ni Gelangre nga sa Smart Blackboard yara na ngadaan ang mga lessons sang manunudlo sa nanari-sari nga subject kasubong man mga activities.
Kasunod sini, ginatuna-an naman sang incoming mayor ang paghatag sang mga laptop kag tablet sa mga estudyante.
Gindangop man sang mga manunudlo ang mga kabataan nga yara lang sa kumunidad apang nahuya nga magsulod sa eskwelahan ukon mga kabahin sa Alternative Learning System (ALS) nga kun mahimo magamit para sa mga ini ang LED Van nga gingamit sang Mayor-elect sa tion sang pagkampanya.
Ginalauman ni Gelangre nga ang administrasyon ni Benitez ang makahatag sang kaayuhan sa bahin sang edukasyon, manunudlo kag estudyante.
Sa karun aminado ini nga pagatun-an pa sang administrasyon ang financial capability sang syudad sa tion nga ini ang makapungko sa pwesto agud maalokar sa mga nasambit nga programa.
