Nagalaom ang presidente sang Bacolod City Public School Teacher Federation nga idefer ang plano nga K-14 curriculum kun sa diin magadugang sang duha ka tuig nga military service, nga ginaduso ni Vice President-elect Sara Duterte sang siya ang nagapangampanya.
Suno kay Richard Gelangre, naintindihan sini kun pasanyugon ang ROTC sa mga eskwelahan apang indi ini pabor sa duha ka tuig nga military service.
Suno kay Gelangre, ang Pilipinas ang indi kaangay sang Israel kag iban nga mga pungsod nga napalibutan sang away.
Suno sa iya, wala ini sang problema sa pagdepensa sa pungsod nagikan sa foreign invasion paagi sa pagpatigayon ang nagakaigo nga training apang kun ipatuman ang K-14, ini ang alang-alang.
Paathag sini nga nagaugyon ini sa pagpreparar sang Pilipinas sa foreign invasion apang kun gamiton ang military service para sa pagpakigbato sa insurhensya, indi na ini insakto.
Ginasuhestiyon man sini ang 15 ka adlaw nga immersion sa military sa sulod sang isa ka tuig bilang reserve force.
Gindugang man sini nga posible ang mga kabataan sang mga pigado lamang ang magatraining kag ang mga bata sang oligarch ang magapangita snag pamaagi agud malikawan ini bangud mabug-at ang duha ka tuig.
Wala paman nahibaluan kun may sweldo sa duha ka tuig nga military service kag suno sa iya, may mga elementary students nga nagabantay sa ila mga manghod samtang ang mga senior high school students ang nagatrabaho naman agud suportahan ang ila pamilya.
Suno kay Gelangre, imbis nga magkooperar ang mga kabataan, posible pa sila nga magrebelde bangud mabug-at na para sa ila ang K-14 curriculum.
