Ginpahayag sang isa ka concerned citizen sa Bacolod City Government Center nga masami sini nga nagakakit-an ang mga grupo sang mga pamatan-on nga imbolbado sa riot sang Domingo, nga nagatambay bilog nga adlaw tubtob kaagahon kag nagapangakig kun sawayon.
Suno kay alyas Jong, adlaw tubtob gab-i may mga grupo sang mga pamatan-on nga nagasulod sa mga bars ukon kalan-an sa BCGC kag nagapangayo-ngayo sang kwarta sa mga customers, nagapanguha sang tip kag nagapanggisi sang mga menu.
Suno kay Jong, kun ginasugid ang nasambit nga mga pamatan-on sa guard, ila pa ini ginalabutaw kag ginahabuyan sang botelya kag bato.
Suno diri, kun kaagahon, ginakuha sang mga ini ang mga lamesa kag ginapungkuan.
Suno sa iya, may bata pa nga ginabanta tatlo ka tuig nga nagaupod sa mga dalagita kag mga solterito.
Ang mga solterito suno diri amu ang mga dungol kag ginaalegar ngasuyop sa mga abandonado nga bars bangud pagwa sang mga ini, nagagwa man ang ila mga kaisog.
Kun kaisa nagapanghaboy sila sang botelya sa dalan nga ginatapakan sang mga salakyan, nagapalagas sa mga pulis kag nagapanago sa mga tanom.
Suno kay Jong, antes ang riot nga nagluntad sang Domingo, ginaalegar sini nga may nag-inaway na nga daan bangud duha ka mga grupo sang mga kalalain-an ang nagalinagsanay kun gab-i.
Nagapati man ini nga nakahibalo ang mga ginikanan sa ginahimo sang ila mga kabataan bangud kaagahon na sila nagapauli.
Pabor ini nga ibalik ang curfew sa mga pamatan-on agud malikawan ang kaangay nga insidente.
