Gin-athag sang Negros Occidental provincial government nga ang dugang nga mga requirements para sa pagtransport sang mga inugbulang nga manok paggwa sa Negros Occidental ang gikan mismo sa Department of Agriculture kag gina-implementar nationwide.
Nahibaluan nga naga-ibwal ang mga nagasagod sang inugbulang nga manok matapos nga nangin tuman na ka budlay ang proseso sang mga ini antes pa mapatabok ang mga manok sa gwa sang probinsya.
Nahibaluan nga sadto, makakuha lang sang permit sa local government unit (LGU) kag sa Provincial Veterinary Office, sarang na nga matabok sa iban nga probinsya ang mga inugbulang nga manok.
Apang bangod sa Avian Flu nga nagalapta sa karun naghugot ang pagpatuman sang Department of Agriculture.
Apisar nga indi kabahin ang probinsya sa mga lugar nga may outbreak sang birds flu, kalakip gihapon ang probinsya sa pagsulundan bangod ini ang gin-implementar nationwide.
Santo sa dugang nag requirement, kinahanglan naman sa karun nga maglabay sa antigen testing ang mga manok.
Apang bangod sa wala sang machine ang Negros Occidental para sa Enzyme-Linked Immunosorbent Assay (ELISA) test gani 10 porsyento sang mga igabyahe nga manok ang kinahanglan nga kuhaon ang sample kag ipadala sa manila kun sa diin may-ara sang machine.
Pagahulaton naman nga makagwa ang resulta sang test antes makagwa sa probinsya ang mga inugbulang nga manok.
Suno kay Negros Occidental Provincial Administrator Atty Rayfrando Diaz, nagpahayag na si Provincial Veterinarian Dr. Renante Decena nga magabakal ang probinsya sang kaugalingon nga ELISA machine agud nga indi na maghulat sang malawig nga tinion sa pagbalik sang resulta gikan sa Manila.
