Patay ang isa ka parolee matapos nga gintiro sang wala pa matumod nga suspetsado sa Purok Lucasan, Couples Ville, Abkasa, Brgy. Mandalagan, Bacolod City kaina sang aga.
Ginkilala ang biktima nga si Francis Mark Rito, 38-anyos, residente sang Purok Pine Tree, Brgy. Bata, Bacolod City.
Sa interview sang Bombo Radyo Bacolod kay Daisy Krause, manghod sang biktima, may nagpahibalo sa ila nga lantawon ang biktima sang shooting incident sa Abkasa gani ila man nga ginpadulungan.
Nakumpirmar sini nga ang biktima ang iya magulang bangud man sa motorsiklo sini.
Suno kay Krause, dungol gid man ang iya nga magulang apang wala siya nakahibalo kun ini ang may kontra.
Dugang pa sini nga wala man nagapahibalo ang iya magulang kun sa diin ini magakadto sa tion nga maglakat.
Ginpahayag man sang manghod sang biktima nga nagaubra man ini bisan paano agud may mahatag sa iya live-in partner.
Suno kay Krause, kun kaisa nagapangayo man sa iya kag sa ila ginikanan sang makaon ang iya nga magulang.
Wala paman sang kabataan ang biktima.
Ginpahayag man ni Krause nga napriso na sadto ang biktima sa kaso nga theft ukon pagpangawat kag nakagwa matapos nga mahatagan sang parole.
