Dose oras nga power interruption ang maeksperyensyahan sang pila ka bahin sang southern Bacolod kag Bago City sa Domingo, Hunyo 5, halin alas-6:00 sa aga tubtub alas-6:00 sa hapon para sa maintenance activities sang National Grid Corporation of the Philippines kag Central Negros Electric Cooperative.
Suno kay Engr. Jose Taniongon, engineering head sang CENECO, igashut down sang NGCP ang Bacolod-Reclamation kag Bacolod-San Enrique 69kV transmission lines may kaangtanan sa ongoing Cebu-Negros-Panay 230kV Backbone Project Stage 3, Phase 1.
Bangud sini, hingalitan sang CENECO ang power interruption sang NGCP agud makapatigayon man sang simultaneous maintenance activities.
Ang NGCP ang mang-ilis sang nabilin nga wood poles bilang kabahin sang wood pole replacement program kag may correction man sang iban nga transmission line defects.
Ang CENECO naman ang magapatigayon sang preventive maintenance kag servicing sang 10MVA power transformer sa Lag-asan Substation, Hda. Hilangban, Brgy. Lag-asan, Bago City kag Sum-ag Substation sa Brgy. Sum-ag, Bacolod City.
May yara man sang correction kag repair sang hot spot sa 69kV kag 13.2kV side sang Lag-asan kag Sum-ag Substations; replacement sang defective auto-recloser units sang Hilangban Feeders 1 to 4 sa Lag-asan Substation; may line clearing nga nagasakop sang Reclamation Feeder 1 to 5, ASDES-Gonzaga Feeders 1 to 6, Sum-ag Feeders 1 and 2, kag HF 1 to 4; kag may preventive maintenance sang distribution lines nga covered sang Hilangban kag Sum-ag Substations and Alijis Feeder 6.
Ginpanugyanan naman ang mga konsumidor nga iturn off ang mga electrical switches para sa safety reasons kag kun magresume na ang power supply, magahatag anay sang allowance nga 10 tubtub 15 minutos antes iswitch on ang tanan nga electrical appliances kag facilities agud malikawan ang power surge.
