Dako ang pagnubo sa narecord nga kriminalidad sa ciudad sang Bacolod sang nagligad nga bulan sang Mayo kun ikumparar sa kaangay nga bulan sang nagligad nga tuig.
Sa record sang Bacolod City Police Office, gikan sa 119 crime incidents sadtong May 2021, nanaog ini sa karon sa 87 ka mga insidente ukon nanaog sang 26.89 percent. Sa 87 ka mga insidente, 66 ang peace and order index samtang 21 ang public safety index.
May dako man nga pagnubo sa index crimes ukon eight focus crimes kun sa diin nagikan sa 24 sang nagligad nga tuig, nanaog ini sa 16 sini nga 2022 ukon may 33.33 percent nga pagnubo samtang ang non-index crimes nanaog man gikan sa 95 sa 71 ukon 25.26 percent.
Subong man, may pagnubo sa over-all Crime Solution Efficiency gikan sa 94.12 percent sadtong 2021 sa 68.97 percent sini nga 2022 apang nalapawan sini ang target sang BCPO nga gintalana sa 66.41 percent.
Ang Average Monthly Crime Rate nanaog sang 26.89 percent gikan sa 19.45 sang Mayo 2021 sa 14.22 sang Mayo 2022.
Ang pagnubo sang nagluntad nga mga krimen sa ciudad ang ginalantaw bangud sang ginpasanyog nga police operations kag crime prevention measures nga ginpatigayon sang nagkalain-lain nga units sang BCPO. Ang regular nga pagpatigayon sang Enhanced Managing Police Operations ang nagbulig man sa pagtalakay, pagsolbar kag pagpatigayon sang nagakaigo kag target-specific interventions sa pagtapna sag kriminalidad.
Wala untat sa pagpahanumdom ni BCPO Director Police Colonel Thomas Joseph Martir sa PNP personnel nga pabakuron ang away batok sa tanan nga sahi sang kriminalidad.
Prayoridad sang BCPO ang crime prevention agud padayon nga mangin malinong kag matawhay ang ciudad sang Bacolod.
