Nalutos ang Negrense boxer nga si Aston Palicte matapos nga ini ang ma-knock out batok kay Jason Moloney sang Australia sa ikatatlo nga round sang hampang sa Marvel Stadium sa Melbourne, Australia kaina sang aga.
Ginhakos sang Australian boxer nga si Moloney ang Hall of Fame promoter nga si Bob Arum matapos ang iya nga pagdaog.
Ini bangod dako ang pagpasalamat sang former 2-time title challenger sa Top Rank founder kag chairman nga nagpati sa iya.
Napamatud-an sang Australian boxer ang iya nga kaugalingon matapos nga mapatumba ang pambato sang Pilipinas nga si Palicte sa ikatatlo nga round sang ila nga bantamweight bout.
Makaduha ka beses nga natumba si Palicte tubtob sa ginpauntat ang hampang sa 2 minutes and 35 seconds sang 3rd round.
Si Palicte ang una naman nga nagbuya sang mabug-at nga uppercut sa opening round, kasubong man ang wala-tuo nga pag-atake kay Moloney apang ang Australian boxer ang madasig nga naka-adapt sa taktika.
Nahimo nga makabawi si Moloney sa ulihi nga minuto sang una nga round, kag ini ang nakapatupa sang tatlo ka natuo nga nagtuga agud nga maguba ang depensa ni Palicte antes matapos ang round.
Sa round two, parehas naman nga gintrabaho sang duha ka boksidor ang pag-atake sa lawas sang kasumpong.
Ginpadayun naman ni Palicte ang pagcorner kay Moloney apang mas nangin madamo ang napasulod nga puntos sang Australian boxer sa ila pagbayluhanay sang inumol.
Ginpasundan naman ini ni Moloney sa round three kun sa diin didto na natumba kag wala nakabawi ang Filipino boxer.
Ang natuo nga inumol ni Moloney amo ang una nga nakatumba kay Palicte, apang nahimo pa sini nga makabangon antes matapos ang pag-isip sang referee .
Apang naubos ang swerte sang Pinoy sang hinali ini nga maigo sang mabaskog nga inumol ni Moloney nga nagtuga agud nga ini ang matumba sa canvass kag ginpauntat na ang hampang.
Wala na napadayun ang three-fight win streak ni Palicte matapos sang kapierdihan kun sa diin ang record sini ang nadagdan na sa 28 wins, 5 losses, 1 draw kag 23 ang knockouts.
Sa karun si Moloney ang nakadaog na sang tatlo ka sunod-sunod nga hampang humalin sa pagkapierde sini sa ikapito nga round kay WBA/IBF bantamweight champion Naoya Inoue sadtong Oktobre 2020.
Ang panibag-o nga pagdaog ni Moloney, ang nakapasaka na sang record sini sa 24 wins, 2 losses kag 19 knockouts, nga natabo 57 ka adlaw matapos sang pagdaog sini sa ika-10 nga round sang nakaligad nga Abril 9 sa nangin hampang sa Costa Mesa, California.
Kasunod sa hampang nanday Moloney kag Palicte, sunod naman nga balantayan sa Martes ang isa ka WBC title eliminator, kun sa diin ang magadaog sa bantamweight championship rematch nanday Inoue kag WBC champion Nonito “the Filipino Flash” Donaire.
