Nagpasalig ang pinuno sang Bacolod City Police Office nga nagagamit sang body worn camera ang mga kapulisan ilabi na sa pagpatigayon sang mga operasyon batok sa illegal nga druga.
Suno kay BCPO Director Police Col. Thomas Joseph Martir, required ang kapulisan sa paggamit sang body worn cameras ukon recording devices sa pagpatigayon sang mga operasyon batok sa illegal nga druga bangud gakadismiss ang kaso sa korte kun wala sang record sang operasyon.
Suno kay Martir, ang tanan nga police station sa ciudad sang Bacolod ang may yara sang tag-isa ka body worn cameras apang kun kinahanglanon sang extra ukon dugang, sarang sila nga makapadulong sa BCPO kag sarang man nga makagamit sang improvised nga pagvideo agud marekord ang ila mga operation.
Wala man sang problema sa iya kun mag-upod ang personnel sang Commission on Human Rights sa ila mga operasyon batok sa illegal nga druga bangud maayo gid kun sila ang makawitness kag sarang sila nga makasuksok sang vest agud indi makulbaan.
