Nagapasalamat ang tagpamaba sang Police Regional Office 6 sa mga pumuluyo kag stakeholders nga nangin malinong kag matawhay ang rehiyon sa bilog nga Election period nga nagsugod sang Enero 9 kag nagtakop sang Hunyo 8, 2022.
Sa interview sang Bombo Radyo kay Police Lt. Col. Arnel Solis, kadungan sang pagtakop sang election period sang Hunyo 8, nagtakop naman ang Comelec gun ban kag bangud sa joint effort sang poll body, Armed Forces of the Philippines kag Philippine National Police, naaresto ang 240 ka mga indibidwal sa Western Visayas kag naconfiscate ang 138 ka mga assorted firearms kag 115 ka mga bladed weapons.
Lunsay napasakaan na sang kaso ang mga nagkaladakpan.
Sa 240 ka mga naapprehend, 28 ang nagikan sa Aklan; 26 sa Antique; 12 sa Capiz; walo sa Guimaras; 42 sa Iloilo Province; 24 sa Iloilo City; 80 sa Negros Occidental; kag 20 sa Bacolod City.
Suno kay Solis, madamo sa ga ini ang nadakpan nga may prior involvement sa alarm and scandal kasubong man sa mga Comelec checkpoints.
Wala naman sang kabahin sang law enforcement unit ukon ahensya sang gobyerno nga nagbayalor sa gun ban.
Sa karun nga nagtakop na ang Election period, magafocus naman ang PRO6 sa peace and order nga ginalakipan sang police checkpoints, visibility patrols kag paglagas sa mga wanted person.
Suno diri, ila ginabantayan nga mamintinar ang kalinong kag katawhay sa komunidad kag kun may magluntad gid man nga krimen, ila pagapatigayunan sang maayo nga imbestigasyon kag pangitaan sang mabaskog nga ebidensya agud mapasakaan sang kaso.
