Ginsuguran na kahapon sang Central Negros Electric Cooperative, Inc. ang pagpanghukas sang mga suga nga illegal nga naangot sa poste sang CENECO kag wala nagaagi sa metro.
Sa interview sang Bombo Radyo kay Coop Promotions Head Malou Parroco, ginpahayag sini nga kahapon, nagsugod na sila sa pagpanghukas sang mga suga nga naangot sa poste sang CENECO kag wala nagaagi sa kuntador nga ginatunaan sang pagdako sang system loss.
Suno kay Parroco, ila ginlibot ang bilog nga Bacolod City kag wala pa naubos ang iban nga areas.
Suno sa iya, ang nasambit nga mga suga ang illegal nga ginpangtakod kag wala nagaagi sa metro.
Kun wala nagaagi sa kuntador ang linya, indi ini mabayaran kag magakadto sa system loss, nga magatupa naman sa mga balayaran sang mga konsumedor.
Ginakabig ini sang kooperasyon nga unfair kag indi insakto bangud kadako sang area sang CENECO gani ila na ginsuguran ang pagpanghukas kahapon kag ini ang magapadayon pa sa masunod nga mga inadlaw agud amat-amat nga maubos ang mga suga nga illegal nga ginpangtakod.
Indi naman madeterminar kun sin-o ang magapanabat bangud indi makit-an ang specific nga persona nga nagtakod sang mga ini.
Suno kay Parroco, sang tinalikdan nga bulan, ila ginmeeting ang mga punong barangay kag ginpahibalo na nga daan sang ila kampanya kag nagpasalig ang mga kapitan nga sila ang magabulig.
Antes ini, una na nga ginhimuan sang tikang sang CENECO ang mga illegal connections sa mga pamalay.
Suno sa iya, kada Lunes may yara sila sang flag ceremoy kun sa diin ginareport ang status sang mga apprehensions, collection kag disconnection units.
