Ginpahayag sang media relations officer sang Vallacar Transit Incorporated nga wala sang ipatuman nga fare increase ang Ceres buses kasunod sang pag-aprubar sang piso nga dugang nga pamasahe sa National Capital Region kag asod-asod nga pagsaka sang presyo sang gatong.
Suno kay Jade Seballos, wala sila sang ipatuman nga saka sa pamasahe bangud bilang miyembro sang Provincial Bus Operators Association of The Philippines (PBOAP), indi sila makadali-dali pasaka sang pamasahe.
Suno kay Seballos, kinahanglan nila nga hulaton ang ipagwa nga fare matrix sang Land Transportation Franchising and Regulatory Board (LTFRB).
Suno diri, ang puwede nila nga himuon amo ang pagfile sang petition kaupod ang PBOAP kag kun maaprubahan na sang LTFRB, mahimo na nila nga ipatuman ang dugang nga pamasahe.
