Nagdangat sa 104 ka mga aplikante ang ginhire gilayon sang ila gin-applyan nga mga kompaniya nga nagparticipate sa Kalayaan Job Fair sang Department of Labor and Employment kahapon, Hunyo 12.
Suno kay DOLE Region 6 Director Atty. Sixto Rodriguez, 57 ang local employers nga nag-upod sa programa samtang pito naman ka licensed employers para sa foreign employment ang nakigbahin kun sa diin nagdangat sa masobra 6,000 ang job vacancies.
Bangod sa pagbaha sang mga aplikante suno kay Rodriguez, ini ang nagapakita lang nga tuman kadamo ang nagakinahanglan sang trabaho sa syudad sang Bacolod kag probinsya sang Negros Occidental.
Ang Job Fair 2022 ang ginpatigayon sang Department of Labor and Employment (DOLE) Region 6 sa SM City Bacolod kahapon kadungan man sang pagselebrar nga 124th Independence Day.
Ang programa ang gintambungan man sang madamo nga mga employers kalakip na ang Bombo Radyo Bacolod nga nagapangita sa karon sang reporter kasubong man newswriter/newscaster.
Yara man sa aktibidad ang mga representative gikan sa Department of Trade and Industry (DTI), opisyales sang SM City Bacolod kag representante ni Bacolod City Mayor Evelio “Bing” Leonardia.
