Ginpahayag sang station commander sang Bacolod City Police Station 4 nga may yara na sang settlement sa tunga sang abogado kag sang pamilya sang 63-anyos nga retired teacher nga nabungguan sa La Salle Avenue, Brgy. Villamonte, Bacolod City sang Hunyo 16.
Sa interview sang Bombo Radyo kay Police Major Ritchie Gohee, nakaestoryahanay na ang abugado kag ang pamilya sang biktima nga retired school teacher.
Madumduman nga nabungguan ni Atty. Roger Jalandoon, residente sang La Carlota City, ang senior citizen nga si Aquilino Cambelisa Jr., 63-anyos, retired school teacher kag residente sang Barangay Mandalagan, Bacolod City sang Huwebes.
Suno kay Gohee natapos na ang pagestoryahanay sang magtimbang nga kampo kag naplastar naman ang amount para sa settlement kag wala na sang kaso nga ipasaka.
Nagpinatawaray naman matapos nga nagpangayo naman sang pasaylo ang abugado kag nakapautwas naman sang hibubun-ot ang pamilya sang biktima.
Suno pa sa station commander wala man sang tuyo nga magpalagyo ang abugado kag ginhulat pa sini ang katapo sang amity agud nga marespondehan ang biktima antes pa man ini nga naglakat.
Ginpamatian man sang pamilya sang biktima ang bahin man sang abugado kag napatawad naman nila ini.
Ginakonsiderar naman sang station commander nga sirado na ang kaso bangud may yara na sang settlement sa tunga sang pamilya sang biktima kag sang abugado.
Nagpanugyan man ini nga likawan ang mangin haras-haras sa pagdala sang salakyan agud nga malikawan nga may mabungguan nga mga nagatabok nga pedestrian.
