Nag-engkwentrohanay ang mga katapo sang 79th Infantry Batallion kag mga miyembro sang New People’s Army sa Sitio Tinibyangan, Barangay Minapasok, banwa sang Calatrava alas-6:10 ang takna kaina sang aga.
Sa interview sang Bombo Radyo Bacolod kay Lt. Col J-Jay Javines, commander sang 79th Infantry Battalion, nagapatigayon ang tropa sang gobyerno sang focus military operations sang nagpadangat sang impormasyon ang mga pumuluyo nga may yara sang presensya sang mga armado nga mga tawo sa lugar.
Sa pagresponde sa lugar, indi magnubo sa 10 ka mga rebelde ang naka-engkwentro sang mga suldado.
Suno kay Javines, naglawig ang engkwentro sang kapin 15 minutos.
Sa karon, wala pa sang body count kun pila ang mga napilasan ukon napatay sa nasambit nga engkwentro bangud wala pa siya sang update bangud wala sang signal sang cellphone sa encounter site.
Suno diri, may nakita nga dugo kag mga kagamitan sang mga rebelde kasunod sang ginapatigayon nga scouring.
Suno sa commanding officer sang 79th IB, luyag kuntani bawion sang mga rebelde ang kontrol sa Sitio Tinibyangan.
Malapit isa ka bulan naman nga ginapangita ang katapo sang Northern Negros Front sa karun apang subong lamang nagtabuay kun sa diin nagluntad ang engkwentro.
Suno sa commanding officer ang grupo ang ginapamunuan ni Ka Roger ukon Felix Cosas Jr. ang secretary sang grupo nanday Ka Ella kag Ka Pabling ang napatay sa engkwentro sang August 2021.
Gin-abisuhan man sini ang punong barangay sang Barangay Minapasok nga pabalikon ang mga nag-evacuate bangud indi sini luyag nga sila ang mapasibangdan sa tion nga magkaladula ang mga kasapatan sang mga residente.
Ginpasiguro man sini nga wala sang dapat kahadlukan ang mga pumuluyo sa ginapatigayon nga military operations sang tropa sang gobyerno.
