Kaso nga muder ang sarang nga atubangon sang menor de edad nga nagtiro sa pareho man niya nga menor de edad sa gwa sang Gaisano Grand Mall sa Barangay Singcang Airport, ciudad sang Bacolod kagab-i.
Sa interview sang Bombo Radyo kay Police Major Joery Puerto, station commander sang Bacolod Police Station 8, affidavit sang pamilya nga magaserbe nga complainant ang kinahanglan agud nga mafile ang kaso batok sa suspetsado.
Suno kay Puerto, murder ang ipasaka batok sa menor de edad bangud nagpauli pa ini kag nagkuha sang pen gun nga amo ang gintiro sa biktima.
Sa imbestigasyon sang Police Station 8, wala na sang ginikanan ang biktima bangud lunsay priso ang iya amay kag iloy bangud sa illegal drug charges.
Sa subong, wala pa nadakpan ang suspetsado.
Suno sa station commander, ang rugby boys sa Singcang Airport ang indi konektado sa grupo nga nag-ilinaway sa Bacolod Government Center.
Suno kay Puerto, masami ginakadtuan sang pulis ang mall apang nagadinalagan ang kabataan kag indi na makit-an.
Aminado naman ang station commander nga kinahanglanon ang intervention sang iban nga ahensya sang gobyerno kag sang barangay agud nga masolbar ang kaangay nga problema.
Suno diri, dako man ang responsibilidad sang mga ginikanan agud indi magliho-liho ang mga kabataan.
