Nagalaom ang convenor sang Amlig Tubig nga makadesisyon na ang Court of Appeals tuhoy sa petisyon sang 50 ka mga empleyado sang Bacolod City Water District (BACIWA) nga nawad-an sang trabaho matapos ang joint venture sang water district kag Prime Waters.
Suno kay Councilor Wilson “Jun” Gamboa Jr., may pending sila nga kaso sa court of appeals kun sa diin sang nagligad nga bulan, isa sa mga complainant ang Amlig Tubig kag luyag nga ibasura ang kontrata sang Prime Waters kag Baciwa.
Suno kay Gamboa, duha naman ka mga abogado ang nagauyat sang kaso sang empleyado nga nadulaan sang trabaho kag sa karun wala pa nakabalik sa serbisyo apisar nga makaduha ka beses na nga nagpagwa sang mando ang Civil Service Commission nga sila ang ireinstate.
Madumduman nga nagfile sang motion for reconsideration ang BACIWA matapos nagpagwa sang desisyon ang Civil Service Commission nga ireinstate ang 59 ka mga empleyado nga ginpahalin sang tinalikdan nga tuig apang ang siyam ang nagbaton sang offer sang Prime Water.
Sini nga semana, nakighinun-anon sang 50 ka mga empleyado sang water district kay Mayor-elect Albee Benitez agud ipalab-ot ang ila mga concerns kag problema.
Nagalaom man si Gamboa nga mahatagan sang pagtamod ang hingyo sang mga empleyado bangud masobra isa ka tuig na nga wala trabaho ang mga ini kag makaluluoy ang ila mga pamilya.
