Malapit katunga sang kabug-usan nga eskwelahan sa Region 6 ang magapatigayon sang limited in-person graduation rites sa masunod nga semana kadungan sang pagtakop sang School Year 2021-2022.
Sa interview sang Bombo Radyo kay DepEd Region 6 public information officer Hernani Escullar Jr., santo sa data nga natipon sang DepEd Region 6, 2,190 ka public kag private schools ang nagsignify nga magapatigayon sang limited in person end of school year rites.
Ini ang ginalakipan sang 1,744 ka public schools kag 446 ka private schools.
Ini ang halos malapit sa katunga sang 5, 068 ka kabug-usan nga eskwelahan sa Western Visayas.
Ang mga eskwelahan sa rehiyon ang ginalakipan sang 4, 045 public schools, 1, 010 private schools kag 13 ka local ukon state universities and colleges.
Ang nabilin sa 5,068 schools nga wala gin-allow sang LGU ang magapatigayon naman sang virtual graduation.
Suno kay Escullar, ginalauman nga sa masunod nga semana, madugangan pa ang numero sang allowed nga magpatigayon sang face to face graduation.
Suno sa public information officer, ginakalipay sang DepEd Region 6 ang nasambit nga development bangud duha na ka tuig nga wala sang in person graduation rites kag ini ang igakalipay naman sang mga estudyante kag ila nga mga ginikanan.
