Hugot ang pagbantay sang Bacolod City Police Office sa inaugural ni Bacolod City Mayor Alfredo Benitez sa atubang sang Bacolod City Government Center subong nga hapon.
Sa interview sang Bombo Radyo kay Police Lt. Col. Lester Leada, chief sang BCPO operations unit, magaprovide ang BCPO sang area kag perimeter security kag sila man ang maga-manage sang trapiko sa palibot.
Kahapon, nag-abot naman ang K-9 Unit nga magabulig sa pagpasiguro sang seguridad sa lugar.
Ang pagbantay sang mga pulis ang nagsugod alas-12:00 kaina sang udto tubtub matapos ang event karon sa gab-i.
Bangud Biyernes subong, nag-abiso ang BCPO nga kun mahimo, likawan ang lakturan sa likod sang BGC agud nga makalikaw sa magutok nga dalagan sang trapiko kag indi maapektuhan sang rerouting.
Ang event ang yara lamang sa atubang sang BGC samtang ang parking area sang VIP ang yara sa likod sang building.
Ginbutangan naman sang railings sa palibot sang BGC agud nga makontrol ang crowd sa event.
Bastante naman ang kadamuon sang pulis nga igadeploy bangud atubang kag likod sang BGC ang ginabantayan kag may yara man sang roving police personnel sa likod sang building.
May yara man sang pulis sa exit padulong sa Esplanade.
Bangud sini, nagpanugyan si Leada sa mga magakadto sa esplanade nga indi magpatupong sa dulom agud indi masitaan.
