Ginmanduan ni Mayor Alfredo Benitez si Bacolod City Police Office Director Police Colonel Thomas Joseph Martir nga sulbaron ang kriminalidad sa ciudad sa labing madali nga panahon.
Sa inaugural speech ni Benitez, ginpahayag sini nga sang nagliligad nga mga inadlaw, ang Bacolod ang gin-terrorize sang nagluntad nga mga kriminalidad, partikular ang mga shooting incidents.
Suno diri, pabakuron sang iya administrasyon ang law enforcement agencies agud masiguro ang katawhayan sa syudad.
Ginmando ni Benitez kay Police Col. Martir nga pasanyugon ang anti-crime operations kag dugangan ang police patrol kag surveillance sa mga hot spots ukon high-crime areas sa Bacolod.
Suno sa alkalde, committed ang iya administrasyon sa paghatag sang mas daku nga budget sa BCPO.
Samtang, ginpasalig man ni Mayor Benitez nga maga-invest ang City Government sa pag-install sang state-of-the-art nga CCTV system kag solar-power street lights agud malikawan ang kriminalidad kag para sa safety sang mga pumuluyo ilabi na ang mga call center agents nga nagapauli sa tion sang kagab-ihon.
