Patay ang katapo sang New People’s Army (NPA) sa nagluntad nga engkwentro sa tunga sang 11th Infantry Batallion sang Philippine Army kag mga rebelde nga grupo sa Sitio Tamusi, Barangay Talalak, Sta. Catalina, Negros Oriental kahapon.
Ang napatay nga NPA member ang ginkilala kay Crisanto Estrabela Lagradilla, katapo sang Squad 2 sang South East Front (SEF) sang NPA.
Santo sa impormasyon nga natipon sang Bombo Radyo Bacolod, ang pagbayluhanay sang lupok sa tunga sang duha ka grupo ang naglawig sang walo ka minutos.
Wala naman sang nasamaran sa bahin sang mga suldado.
Ginapatihan nga nagbalik ang mga nabilin nga katapo sang napuhag na nga makawala nga grupo sa tinutuyo nga ini ang liwat nga tukuron.
Narecover sa encounter site ang isa ka unit sang KG9 riffle, magazine sang KG9 nga naga-unod sang 20 rounds sang live ammunition; isa ka magazine sang cal. 45 nga may tatlo ka unod nga live ammunition; magazine sang M16 nga may walo ka live ammunition; isa ka bandolier; duha ka baofeng radio; kag isa ka backpack nga naga-unod sang mga subersibo nga mga dokumento nga may mataas nga intelligence value.
Sa karun, ang bangkay sang katapo sang NPA ang yara na sa isa ka punerarya sa banwa sang Siaton kag ini ang ginaproseso sang Scene of the Crime Operatives (SOCO).
