Gin-ako sang pila ka driver sang public utility jeepneys sa Bacolod nga indi pa sila makasukot sang P11 nga regular minimum fare bisan aprubado na sang Land Transportation Franchising and Regulatory Board ang P2 nga fare increase nga nagtake effect Hulyo 1.
Sang Hunyo 29, gin-aprubahan sang LTFRB ang P11 nga minimum regular fare nationwide.
Ang P2 nga fare increase ang idugang sa P9 nga regular fare antes ang COVID pandemic.
Ang pamasahe subong nga P10 ang temporaryo lamang halin sang April 2020 bangud sa COVID restrictions kag wala ini sang taripa.
Sa interview sang Bombo Radyo kay Jomitchel Lucop nga nagabyahe sang jeep nga Bata-Libertad, wala pa ini nagasukot sang P11 bangud nagapangita sang fare matrix ang mga pasahero.
Suno kay Lucop, indi sila makasukot sang P11 nga wala sang taripa bangud magaresulta lang ini sa pag-inaway sang driver kag pasahero.
Wala man sang abiso sa ila ang operator kun san-o makuha sang fare matrix.
Bangud sini, P10 ang minimum nga pamasahe samtang P15 naman halin sa Bata tubtub sa Libertad bangud lapaw na ini sa 4 kilometers.
Suno sa PUJ driver, P1,200 ang magasto niya sa diesel samtang P550 naman ang arkila sa jeep.
Bangud sini, P300 lang ang madala ni Lucop nga income sa pagtakop sang iya nga byahe.
Nalipay naman ini nga bisan gamay lang, apang may rollback sa diesel sa masunod nga semana sangsa wala gid sang pagnubo sa presyo.
