Luyag ni President Ferdinand “Bongbong” Marcos Jr. nga tinluan sang Department of Social Welfare and Development ang listahan sang mga benepisyaryo sang mga social assistance programs sang ahensya.
Suno kay DSWD Secretary Erwin Tulfo, ang mga indi na kwalipikado sa programa ukon nagraduate na nagikan sa conditional cash transfer program (CCT) ukon mas kilala bilang Pantawid Pamilyang Pilipino Program ukon 4Ps ang dapat isurrender ang ila accounts.
Suno kay Tulfo, ini ang mando sa iya sang Presidente bangud linibo ka mga Filipino sa pungsod ang nagahulat nga malakip sa 4Ps kag sila ang makabenepisyo kun tinluan ang listahan sang cash transfer program.
Gina-identify sang DSWD ang mga benepisyaryo sang 4Ps kag iban pa nga social assistance programs paagi sa National Household Targeting System for Poverty Reduction ukon Listahanan.
Agud ini ang ma-execute, si Tulfo ang magapagwa sang “amnesty” call sa masunod nga mga semana para sa mga indi na kwalipikado nga benepisyaryo sang 4Ps nga isurrender ang ila accounts sa DSWD sa sulod sang 30 tubtob 60 days kun indi nila luyag mag-atubang sang kaso.
