Nagalaom ang Trade Union Congress of the Philippines nga indi kuntani malipatan ni President Ferdinand ‘Bongbong’ Marcos ang natalupangdan niya nga mga problema sang pungsod nga dapat hatagan sang nagakaigo nga pagtamod.
Sa interview sang Bombo Radyo kay TUCP spokesperson Alan Tanjusay, mabatyagan ang sinseridad kag honesty ni Bongbong Marcos sa iya nga inaugural address sang Hunyo 30.
Suno kay Tanjusay, ginpakita ni Marcos nga nabatyagan sini ang problema sang mga Pilipino bangud sa iya ginhambal nga “Ang pangarap ninyo, pangarap ko”.
Para sa labor sector, ginmention sang presidente ang creation sang trabaho kag patas nga sweldo.
Suno kay Tanjusay, ginapahibalo sang presidente sa mga employers nga ihatag sa mga empleyado ang nagakadapat nga sweldo agud nga makarecover ang mga Pilipino nagikan sa epekto sang pandemic.
Kun yara ang endo, wala sang matuod nga pag-umwad suno kay Tanjusay bangud samtang nagarecover ang pungsod, may mga empleyado gihapon nga indi permanente sa ila trabaho kag indi mag-igo ang ila sweldo.
Ginarekomendar man sang TUCP ang tayuyon nga relasyon ni Marcos sa mga mamumugon kag iban pa nga sektor agud nga iya mahibaluan kun ano ang kinahanglanon sang mga ini.
Suno diri, indi dapat nga magdistansya si Marcos sa mga sektor agud nga magamit sini ang political will nga solbaron ang problema, indi kaangay sa nakaligad nga mga administrasyon nga wala na nagkonsulta sa apektado nga mga sektor.
